Maa

Vo din bachpan ke, humari atkheliyon par uska yun muskurana…
Vo ungli pakad kar un nanhe nanhe kadamon ko chalna sikhana…
Vo khane se door bhagne par uska peechhe peechhe daud lagana…
Aur roz zidd karne par pariyon ki kahani sunana…


Jo taqleef seh kar ek nayi zindagi ko is duniya me laaye…
Vo hai Maa…


Gar halki si kharonch bhi aaye to uska pal bhar mein ghabra jana...
Vo dard humein ho to uska chhup chhup kar aansu bahana…
Galati karne par uska khoob daant lagana…
Aur phir kuchh hi der mein gale lagakar pyaar jatana…


Jiski mamta ki chhaon mein din bhar ki thakaan mit jaye..
Vo hai Maa…


Har chhoti chhoti baat ko sehensheelta se samjhana…
Zindagi mein har achhe bure ka fark batana…
Vo hamare sabhi doston ke sath khud bhi dost ban jana…
Vo der raat ko padhte vaqt uska baar baar pyaar se sehlana…


Jo dost bankar sabhi mushkilon mein saath nibhaye…
Vo hai Maa…


Vo hamaare bhavishya ke liye dil mein kayin armaan sajana…
Hamari khwaishon ke aage, apni sabhi khushiyon ko bhool jana…
Hamare dil ki har baat bina kahe hi samajh jana…
Apni puri zindagi bas apne bachchon ke liye bitana..


Jiske pyaar ka kabhi koi mol na kar paye…
Vo hai Maa…

Love u Maa...

Happy Mother’s Day!!!